Vuelta a España fóra da Galiza!

De mércores 10 a domingo 14 terá lugar a celebración das últimas 5 etapas da Vuelta Ciclista a España nas estradas do noso país. O deporte, como todo, tamén é política e esta proba non é unha excepción presupondo a españolidade do noso territorio e normalizando a simboloxía española por toda a xeografía galega xa sexa no urbano ou no rural. As probas deportivas (nomeadamente o fútbol, mais non só) non serven a fins neutrais como tanto teiman en nos repetir; sabemos que son utilizadas cuns fins políticos moi concretos: como arma politizadora e ideoloxizadora de propaganda, exaltación do proxecto español, normalizando nas rúas unha simboloxía que rexeitamos e que representa a negación da nosa nación e eliminando o sentimento galego na nosa terra para sermos máis colonia, desta volta empregando para iso orzamento público.

A Xunta de Galiza afogou desde un comezo ao deporte de base, retiroulle todo tipo de apoios e subvencións, calcelou os tradicionais xogos amigábeis das nosas seleccións nacionais (non falamos xa da prohibición que existe da posibilidade de competir internacionalmente) e mesmo eliminou o equipo ciclista profesional galego alegando falta de cartos e austeridade. Austeridade que non existe á hora de pagar o paso das etapas polo noso país cuxo importe económico é descoñecido con exactitude sendo ocultado premeditadamente pola administración. Ocultado foi tamén o custe económico da edición do pasado ano, que tivo a súa saída en Vilanova de Arousa, e que se chegou a estimar en máis dun millón de euros (gastando até 150.000€ só no anuncio promocional, por exemplo).

Desde Isca! denunciamos o obxectivo político incuestionable que a presenza da Vuelta a España significa no noso país, colonizado e empobrecido desde hai décadas por parte dun Estado que vulnera os nosos dereitos políticos e teima en liquidar a nosa lingua, cultura e identidade. Chamamos a toda a mocidade galega a respostar de xeito activo enchendo de simboloxía nacional galega o percorrido, bandeiras ou murais na propia rúa para mostrar ao mundo a existencia dun conflito político no noso país e a lexítima reivindicación independentista.

Vuelta a España fóra da Galiza.