Solidariedade con GzVideos

De Isca! queremos amosar o noso apoio e solidariedade ao colectivo audiovisual Gzvideos, que ven desenvolvendo un importante labor contra-informativo, difundindo actividades dos movementos sociais galegos e dando voz a novas que son silenciadas habitualmente pola prensa empresarial, e que é obxecto na actualidade dunha campaña represiva por parte dos corpos policiais do Estado Español.

Logo dunha denuncia falsa a un dos seus reporteiros e dunha retención da garda civil a outro deles, unha das activistas foi acusada de berrar contra os axentes durante unha manifestación no 2008, algo que nunca se produciu, e que evidencia o intento por calar unha voz independente e crítica como é GzVideos e contra a liberdade de expresión e información.

Non é un facto isolado nen novidoso na “democracia” española, que recorre frecuentemente á represión e à anulación dos dereitos civís para calquera discrepante co ordenamento político-xurídico do Estado, non dubidando en por o seu aparato policial para tales fins, penalizando a difusión de calquera actividade que o poña en cuestión.

Desde aquí, enviámoslle unha aperta de apoio aos e às activistas de GzVideos, repetindo, con eles e a modo de homenaxe, o seu lema: Apaga a tv, prende a túa mente!