Isca participou por segundo ano consecutivo nas manifestacións do 1º Maio, aderindo as convocatorias da CIG en Vigo, Compostela e Ourense. O mal tempo non logrou impedir o suceso das mobilizacións do sindicato de clase nacional, que un ano máis logrou convocar o maior número de traballadores e traballadoras na xornada do “Día Internacional da clase traballadora”.
Isca! acudiu con faixas e material proprio ás mobilizacións, baixo o lema “Aquí e agora, Loita de clases” e vindicou “un novo modelo sustentábel baseado na xustiza social, protagonizado pola clase traballadora e os movementos populares, e amparado nun sistema democrático e participativo”. Tamén sinalamos a falta de soberanía da Galiza como causante da “asalarización, a destrución de sectores produtivos, a imposición do consumismo e os recortes de dereitos para a clase traballadora”.
Finalmente, de Isca denunciamos no Rebater do 1º de Maio a deriva populista de parte do nacionalismo, “que nega a realidade da loita de clases para reclamar unha adhesión nacional a empresas que funcionan nunha difusa “chave de país”, sen diferenciar os proxectos contraditorios entre clases sociais e os seus diferentes intereses”.
Entre as actividades do 1º de Maio podemos sinalar a confeción dun mural nunha céntrica rúa da cidade de Vigo, co lema “Socialismo é Xustiza, Independencia é liberdade”. Podes velo na galería de imaxes.
Tags: 1-de-maio, cig, rebater