A seguir reproducimos o comunicado feito público polo MGS sobre a ilegalizacion de Bildu:
O Movemento Galego ao Socialismo oponse á ilegalización das candidaturas da coalición Bildu, formada por Eusko Alkartasuna, Alternatiba e independentes, para as eleccións do próximo 22 de maio.
Esta nova aberración xurídica responde a unha decisión política de PP e PSOE con un dobre obxectivo: por unha banda, privar a un importante sector da sociedade vasca de representación institucional, falseando os resultados das eleccións; por outra, impedir o desenvolvemento do proceso que unilateralmente puxo en marcha a esquerda abertzale co obxectivo de acadar a paz e a normalización política. Esta nova ilegalización afecta a dous partidos plenamente legais e a candidatos que asinaron todos eles o seu rexeitamento explícito da violencia, polo que resulta ainda mais inxustificábel e evidencia máis se cabe o carácter antidemocrático do estado español.
Desde o MGS, do mesmo xeito que xa teñen manifestado o BNG ou a CIG, defendemos a legalización de Bildu, así como de Sortu e de todas as organizacións abertzales ilegalizadas polos tribunais españois, e reclamamos novamente o fin das políticas represivas de cara a facilitar chegar canto antes a un escenario sen violencia e onde todas as opcións políticas podan defenderse en pe de igualdade, co único límite da vontade democrática do pobo vasco.