[10º aniversario] Novos folgos para seguir loitando
- Actualidade política
A nosa organización celebrou o seu décimo aniversario o pasado sábado día 18 de xuño en Compostela cunhas xornadas nacionais nas que combinaron formación política con eventos divulgativos e lúdicos.
A xornada de mañá comezou coa intervención de Antolín Alcántara, dirixente da CIG e militante do Movemento Galego ao Socialismo, que falou do contexto de crise capitalista e da necesidade da acción sindical dentro de parámetros da loita de clases, así como da decisiva orientación que as comunistas deben imprimir á mesma de cara a conseguir a mudanza na correlación de forzas. Despois da proxección dun vídeo con entrevistas a numerosa militancia, onde se explicaron as causas que motivaron a constitución de Isca!, foi o turno para Breixo Lousada e Ximena González, que fixeron un repaso a súa etapa como militantes da organización, así como dos retos que na súa opinión confronta tanto o movemento soberanista galego como o espazo político que partillan Isca! e o Movemento Galego ao Socialismo.
Xa de tarde tivo lugar un roteiro histórico-político por Compostela e un encontro internacional organizado en Bonaval que contou coa participación de Jakson Renner, brasileiro afincado en Galiza da Plataforma de Brasilegos Contra o Golpe que falou do golpe de estado institucional no Brasil; Oriol Sardà das Assemblees de Joves per la Unitat Popular, organización xuvenil catalana independentista que nos falou do actual proceso soberanista e a construción da súa República; e Mónica Sanchez, cónsul de Venezuela en Vigo que tratou a situación política do seu país e os retos da revolución bolivariana. Ademais estivo presente o histórico Farruco Sesto, fillo de galegos emigrados e ex-ministro nos gobernos de Hugo Chávez e Nicolás Maduro.
A xornada culminou cun exitoso concerto que logrou reunir centos de mozas na praza compostelá do 8 de marzo. Alén de Poetarras, Trapallada e NAO, as militantes da nosa organización desenvolveron unha acción de denuncia feminista contra o sistema heteropatriarcal, así como unha intervención política a cargo de Elia Lago e José Rodríguez xunto a Noa Presas, candidata a deputada polo BNG na provincia de Ourense e militante de Isca! e o MGS. Nesta destacouse a traxectoria de Isca! nestes anos, que levou adiante un discurso independentista e desacomplexado, traballando lealmente nun BNG atravesado por múltiples renuncias e contradicións e unhas formas de traballo novas e diferentes. Para finalizar, animamos á mocidade á organización para a ruptura co Estado Español e a construción da nova República Socialista Galega.
.
